لندن،2جولائی؍(ایس اونیوز/آئی این ایس انڈیا)ہفتے کے روز برطانوی دارالحکومت میں سینکڑوں افراد برطانیہ کے یورپی یونین سے آئندہ اخراج کے خلاف مظاہرہ کر رہے ہیں۔ برطانیہ میں یورپی یونین کی رکنیت کے حوالے سے ہونے والے حالیہ ریفرنڈم نے اس موضوع پر عوام میں پائی جانے والی خلیج مزید گہری کر دی ہے۔ بتایا گیا ہے کہ ہزاروں افراد ہفتے کے روز لندن میں پارک لین سے پارلیمنٹ ہاؤس تک مارچ کریں گے۔ رواں ہفتے کے دوران یہ دوسرا موقع ہے کہ لندن میں اس طرز کا احتجاج کیا جا رہا ہے۔ دوسری جانب بتایا جا رہا ہیکہ فی الحال برطانوی حکومت یورپی یونین سے اخراج کے لیے لزبن معاہدے کے آرٹیکل پچاس کو لاگو کرنیکا ارادہ نہیں رکھتی اور اس میں مسلسل تاخیر پیدا کر رہی ہے۔ یورپی یونین کی جانب سے دباؤ ڈالا جا رہا ہے کہ برطانیہ جلد از جلد اس آرٹیکل کا نفاذ عمل میں لائے، تاکہ بے یقینی کی کیفیت ختم ہو۔